Kalaallit Nunaat Inatsisartut inatsisaannik nr. 7-imik, 13. juni 1994-imeersumik Inatsisartut akuerinninneratigut Ombudsmandeqalerpoq. Atorfeqarfik cand. jur. Emil Abelsenimit 1995-imit 1996-imut ingerlanneqarpoq. Massakkut Ombudsmandiusoq tassa cand. jur. Vera Leth.

Ombudsmandi Inatsisartunit qinerneqartarpoq, Namminersornerullutillu Oqartussat kommunillu inatsisit atuuttut ingerlatsinermilu ileqqorissaarneq naapertorlugit ingerlatsinerat Inatsisartut sinnerlugit nakkutigisaralugu. Ombudsmandi sulinermini Inatsisartunut naalakkersuinermullu attuumassuteqarnani sulivoq.

Ingerlatsinermi oqartussaasut aalajangiineri kiisalu innuttaasunik sulianillu suliarinninneri pillugit naammagittaalliuutit Ombudsmandip suliarisinnaavai. Tamatuma saniatigut suliat Ombudsmandip nammineerluni misissuiffiginninnermik aallartitsivigisinnaavai, oqartussaasullu sulianik suliarinninnerat ataatsimut misissuiffigisinnaallugu.

Ombudsmandi aammattaaq A/S Inissiaatileqatigiiffik INI pillugu sulianik 1. januar 1997-imit atuutilersumik suliarinnissinnaalerpoq, tassa suliani Inissiaatileqatigiiffiup Kalaallit Nunaanni Namminersornerullutik Oqartussat kommuniluunniit sinnerlugit aalajangiinissamut piginnaatinneqarfigisaani.

Ombudsmandi kommuninut akuttunngitsumik tikeraartarpoq, innuttaasullu tikeraarnerni taakkunani Ombudsmandi ornillugu saaffiginninnissaminnut periarfissinneqartarlutik. Aammattaaq sulianik aalajangersimasunik amerlassusilinnik misissugassanik tigulaarinnittoqartarpoq. Piffissap qinigaaffiup Inatsisartut ukiut sisamakkaarlugit qinigaaffigisartagaata ingerlanerani kommunit ikinnerpaamik ataasiarlutik tikeraarneqartarnissaat Ombudsmandip kissaatigaa.

Ombudsmandip oqaaseqaatai immikkut toqqakkat Ombudsmandip ukiumoortumik nalunaarutaani naqinneqartarput. Taakku nittartakkami matumani atuarneqarsinnaapput.